Caballero

O alcalde de Vigo vén de poñer en poxa os mobles do despacho de Corina Porro e para elo abre as portas:  que a xente pase por alí, vexa e compre. Que Abel Caballero ten alma de feirante é algo que os visitantes ocasionais de Vigo xa intuiamos, e que os vigueses teñen por certeza. Poñer un feirante a gobernar a cidade de maior peso de Galicia non é bo nin é malo, porque depende do feirante, pero Caballero é dos tremendos; un señor acomplexado que enche as rúas con eses carteis de feito pola Alcaldía (feito por min) e que ten o límite do ridículo moi baixo, co apuro que sempre dá iso. Despois de catro anos cos mobles do despacho de Porro intactos agora acorda que son luxosos e non valen, e monta un mercado de oportunidades a un mes das eleccións para chamarlle parvo ao pobo, que é como se lle chama á xente cando un fai da súa xestión un recital de carteis, placas e espectáculos pancistas. Seica foron dez persoas por alí a botarlle un ollo á cousa, enténdese a que a metade delas xornalistas e a outra metade curiosos rebotados do Centro Reto. Non sabemos se o alcalde levanta as cadeiras como se fosen bragas e grita iso de que llo están a quitar das mans. Que ande con coidado, non o vaian levar a el para casa, pois agora mesmo en Vigo non parece que haxa ninguén que pague máis por un alcalde que por unha mesa.